A Consellería Do Mar Axiliza Os Prodecementos De Devolución De Moluscos En Casos De Peches Temporais De Zonas De Produción

O Diario Oficial de Galicia publicou onte unha orde que establece un procedemento áxil nos supostos de devolución de moluscos bivalvos ao viveiro ou lugar de orixe no caso dos lotes recollidos previamente ao peche temporal dunha zona de produción. Deste xeito, facilítase o proceso permitindo ao produtor proceder á devolución de moluscos co menor prexuízo económico posible e mantendo a imprescindible garantía de seguridade na cadea alimentaria.

A orde sinala que os moluscos bivalvos recollidos nesa zona de produción desde as 00:00 horas do día anterior ao peche temporal, poderán ser devoltos ao viveiro ou lugar de orixe cando o lote aínda non entrara no establecemento de destino ou, cando tendo entrado no establecemento de destino este confirmase a recepción a través dos medios telemáticos habilitados pola Consellería do Mar.

Nestes casos, a través desta orde, axilízase o proceso podendo facer a solicitude de devolución de moluscos por vía telemática e obtendo a autorización automaticamente a través dunha aplicación dispoñible en www.pescadegalicia.gal ou a través dos terminais TICPESC ubicados nos distintos portos galegos. Ata agora o procedemento era máis longo e facíase mediante resolución da dirección xeral de Pesca, Acuicultura e Innovación Tecnolóxica, baseada en informes previos da Consellería de Sanidade e do Instituto Tecnolóxico para o Control do Medio Mariño (INTECMAR).

O feito de que a solicitude sexa telemática permite que todos os actores implicados (Consellería do Mar, Consellería de Sanidade, INTECMAR e Subdirección Xeral de Gardacostas de Galicia, entre outros) dispoñan de toda a información en tempo real.

A orde publicada hoxe no DOG modifica á do 8 febreiro de 2008 sobre o control da descarga e do transporte dos produtos pesqueiros frescos ata a fase de primeira venda e o transporte de moluscos bivalvos, equinodermos, tunicados e gasterópodos mariños vivos e entrará en vigor a partir de mañá.

Especifica que no caso de peche temporal dunha zona de produción e de reinstalación, as entidades encargadas de expedición do documento de rexistro deixarán de expedir documentos para esa zona. O documento de rexistro é aquel que identifica a zona de produción de procedencia do molusco durante toda a fase de comercialización ou transformación e que ampara o traslado do molusco aos destinos autorizados (depuradora, centro de expedición, establecemento de transformación).

Ademais, no caso de devolución, a entidade ou persoa que emitiu o documento debe proceder á súa anulación empregando os mesmos medios telemáticos utilizados para a súa emisión. O documento de rexistro que ampara a ese lote quedará marcado como “Anulado por devolución”. Estas disposicións tamén serán de aplicación aos lotes amparados unicamente polos documentos de orixe.

Por outra banda, a orde especifica que entre o momento da anulación do documento de rexistro ou de orixe e o traslado do molusco ao viveiro ou lugar de orixe deberán transcorrer como mínimo 3 horas. En todo caso, a devolución do molusco ao viveiro ou lugar de orixe realizarase dentro das 72 horas seguintes ao peche da zona de produción.
 

modificacion orden control de descarga de mejillon.pdf